من ضحايا الطوارىء

كل يوم وكل لحظة وكل ساعة بنعرف ضحية جديدة 

من ضحايا نظام الطوارىء 

اللى بلانا بيه ربنا من الحكومة اللى متعرفش دين ولا رحمة

شكلنا كدة والله أعلم لازم نتعذب واحد واحد 
ولازم حبيب العادلى يوجعنا بيت بيت

طالما مبقيناش نحس ببعض او ان اللى جرالك يبقى جرالى 
واللى يوجعك يوجعنى

لا ... لازم انا اتوجع فشيء يخصنى وانت تتوجع فاللى يخصك 
وهو 
وهى 
وهما

وكل واحد ميتكلمش بقى ولا يفتح بقه خلاص ..هى الدنيا بقت كدة

بس انا موضوع خالد تاعبنى ... صورته تعبانى 
كل شوية بتخيل لحظة ما ضربوه وكسروله جمجمته 
لحد ما مات فى ايديهم

قرتله الفاتحة من قلبى كتير ... بطلب من ربنا يرحمه بجد

مش عارفة الحل ايه ؟؟
ياربى دا قانون الطوارىء صوتنا اتنبح نقول مش عايزينه 

وبرضه جددوه ولا كأنهم سامعيننا

طيب نعمل ايه ... ؟؟؟

مظاهرات ؟؟؟

بيستقلوا عددنا وياخدونا هيلا بيلا

وكالعادة .. نفكنا مالموضوع الأساسى وننشغل فالقصة المحفوظة

أفرجوا عن المعتقلين 
فرى مش عارف مين 
والحرية لمين 
وأخد اخلاء سبيل ولا لسه
وتم اعتقاله بعد اخلاء السبيل ولا لسه
ولو اتطمننا انه عاد سالماً غانماً نعمله تكريم ....ـ

كل دا تقدير وتكريم وحب مننا لإخواتنا 
اللى بيدفعوا تمن كلمة حق 
زى ما كل واحد فينا عمل وبيعمل وعنده استعداد يعمل

بس احنا كدة كل مشكلة بتواجهنا بنسيبها من نصها

مفيش عمل سياسى واحد بنكمله للأخر 
لو احنا بتوع سياسة وبنتكلم فالسياسة

وإن جيت تتكلم مع حد يقوللك 
لا ياعم انا مش بتاع سياسة ؟؟

أو لا ياعم انا عندى عيال ؟؟؟

أو لا ياعم اما تبقى ثورة شعبية فيها ملايين 
أبقى ساعتها أفكر انزل معاهم

أنا مش عارفة ...ـ

مش عارفة أعمل ايه لخالد

دا حتى قبضو على محامينه وأهله والشهود عالواقعة 
والناشطين السياسيين اللى نزلوله

اللى هو نظام ايه 
ـ" واللى بيحبه ومن جواه بيحبه وقاعد جمبه حد بيكرهه "ـ

حرام يعنى ،،،
وطلعوا اقرار بإن هو مات أوفر دوز وان هو اللى عمل كدة فروحه

يعنى انت بقى 
كدب عينيك وكدب لسانك وكدب عقلك وكدب الناس 
وصدقهم يا كلب

أحسن يجرالك اللى جراله

مع اننا كدة او كدة جرالنا وهيجرالنا اللى جراله

مسألة وقت مش أكتر

وقت وهننسي ،،، أو وقت وهيحصل لحد تانى نفس السيناريو ونرجع نعمل كل اللى بنعمله دلوقت بتفاصيله

أعمل ايه ؟؟؟

Read More

سبب أحداث 2 مايو رغم أن عيد العمال 1 مايو

حصل العمال على حكم يلزم الحكومة المصرية بوضع حد ادنى عادل للأجور في القطاعين الخاص والعام ،،

و الحكم يُلزم رئيس الوزراء شخصياً الدكتور / أحمد نظيف 

بتنفيذ القرار http://21606.info/node/8 
في مدة لا تتجاوز الثلاثين يوما والا تعرض للحبس لرفضه تنفيذ الحكم القضائي وذلك فى يوم 3/4/2010 توجه وفد من العمال إلى مقر رئاسة الوزراء لتسليم قرار المحكمة إلى رئيس وزراء مصر 

لكنه تعامل مع الموضوع باستهانة و أُبلغ الوفد أنه غير متواجد في مقره ،،

لذلك تناشد مجموعة العمال الذين تظاهروا أمام مجلس الوزراء يوم 3 من أبريل كل المصريين العاملين الانضمام إليهم في اعتصامهم المفتوح أمام مجلس الوزراء يوم الثاني من مايو القادم 2010 بالساعة الثالثة عصرا لإلزام الحكومة بإنفاذ الحكم القضائي إما الاستقالة ما دامت غير متفرغة لشئون العاملين بالدولة ،،

اعتصام االثاني من مايو ليس محض اعتصام يهم فئة معينة من المصريين، و لا حدثا سياسيا عابرا للتعبير عن رأي معارض لسياسات النظام المصري، و ليس لتحقيق مطالب خاصة بشريحة معينه من المصريين أو مطالب شخصيه لا تهم غير المطالبين بها، بل للمطالبة بتحقيق حد أدنى من الحياة الكريمة للمصريين جميعا بوضع حد أدنى لأجورهم؛ بوضع حد أقصى للقهر و الاستغلال الواقع عليهم ،،

فعلى كل من يطالب بحد ادنى لأجره كى يستطيع ان يعيش بكرامته مادياً واجتماعياً المشاركة وليس أكثر ،،

وشكراً

Read More

أمريكا أم مناخير كبيرة

أمـريـكـا أم مـنـاخـيـر كـبـيـرة

اتحشرت فى اللى ملهاش فيه واتدخلت بنفحة من الرخامة وشلحة من الجلياطا ورفضت

رفضت اية يادى المصيبة ؟؟

رفضت كل البتنجان اللى حصل فى مصر يوم 6 ابريل اللى فات وراحت بعتالنا كلمتين فى بيان جامد كدة من وزارة الخارجية بتاعتهم لوزارة الخارجية بتاعتنا وقالت لنا فى البيان كلام من نوعية : -
أنا ماما أمريكا
أنا اللى فى الشدة شديد وفى القوة قوى
أوى أوى
أنا جدع
انا عمهم كلهم
انا عمك واللى الناس متعرفوش انى عمك أخو أبوك يا لمبى

تمام؟
هنقول تمام

مـصـر قـالـت لـهـا ايـة بقا ؟؟

قالت لها وانتى مالك انتي يا أمريكا يا وحشة يا حشرية يا أم مناخير كبيرة
شعبى وأنا حرة فيه
أنا اللى لاقيته
انتى هتبصيلى فى اللقمة ولا ايه !!!
موحنون : وكملت حكومتنا الموقرة معاملتها المهينة لنا عادى جدا وبالحدث دا تأكدنا فعلاً ان حالنا صعب عالكافر بجد مش كلام مش بس كدة
بالعكس .... أبسليوتلي
الإعلام الجميل بدأ النهاردة ببرناج 48 ساعة على قناة المحور
الحاج / سيد ، والحاجة / هناء أعلنوا الخبر عادى جداً وأطلعونا عالبيان وكلموا المسئولين واتأكدوا مالخبر
بأى صيغة ؟؟
أنا مصر اللى مبخافش من أمريكا أنا اللى بعرف أرد وأقول لأمريكا وانتى مال أهلك كأنها خناقة من طرفين
والمفروض اى دولة شقيقة تيجى تحوش عن أمريكا وتبعدها من قدام مصر وتقوللها إبعدى عن وشه الساعة دى :D

إتــكــلــم
إتكلم يابن الــــشــعــب
بلا خوف
تكلم وإياك أن تخشى شيئاً
ولا تنسي أنت فى قلبى

الديكتاتور اللى يطلب تأييد الناس ويخلليهم يـ .......

شكراً سيادة المواطن

Read More

عشان مبيعرفش

عشان مبيعرفش

عشان هو بجد مبيعرفش

مبيعرفش يعمل الغلط وبيروح دايماً للصح
وعشان هو مبيعرفش يبقى غلط
الناس فاكرينه غلط وعمرهم ما فهمو انه فعلا صح

وعشان مبيعرفش يكدب ... محدش بيصدقه
وان عرف يكدب .... صوته مبيعرفش يكدب

وعشان مبيعرفش يظلم حد .... هييجى فيوم على حق نفسه ويحكم بالاعدام على حياتة
مبيعرفش يظلم حد معاه ... لكن يعرف يقتل نفسه وتوأمه

مبيعرفش يحب ....بيعرف يعشق لدرحة الجنون ولو انها معادتش تنفع ولا تتصدق دلوقت

مبيعرفش يبقى احسن ... غير لما يحس ان اللى بيحبوه عاوزينه احسن

مبيعرفش يبقى جدا ولا يعرف يبقى جدا جدا
مبيعرفش يبقى أوى أوى أوى
بيعرف يبقى فور ايفر وحتى الموت والكلام الجامد دا وبس


مبيعرفش يعيش ولا بيعرف يموت ولا حتى بيعرف ينتحر
بيعرف يصلى ويدعى ... لكنه مبيعرفش ربنا بيتقبل منه ولا لا

مبيعرفش يقنع اى حد بأى حاجة ... ممكن عشان مبيعرفش يتكلم او يعبر عن اللى جواه
فبيكتفى برأيه ويتنازل عن اقناع الأخرين

مبيعرفش يعمل فرحان وهو مش فرحان ولا دايق طعم الفرحة

مبيعرفش يقفل ستارة ..... خايف محدش يصقف

Read More

تعرف منين انك عايش

تعرف منين انك عايش
تعرف منين انك لسة مموتش
ما يمكن تكون مت .....
او ما يمكن تكون عايش بس حاسس انك ميت ....
ولاتكونشى ميت من زمان بس فاكر نفسك عايش
طب نتأكد منها ازاى دى .....

أنا اقوللك بقى يا سيدى
عايزنى أقنعك الأول بإية
انك عايش .... ولا انك ميت

ماشى .... هقنعك انك عايش مع انك حاسس انك ميت
بص يا سيدى
انت لما بتصحى متلاقيش حد يصبح عليك ولا حتى يتف فوشك بتفتكر نفسك ميت
بس لما تدخل الحمام وتلبى نداء الطبيعة .... هتلاقى حاجات غريبة كدة لازم يتشد لها احلى سيفون
تبقى كدة عايش يا معلم
هتدخل المطبخ تعمل حاجة تشربها ولا تاكل لك لقمة
هتلاقى الأكل بينقص أد ما كلت
وان شربت حاجة برطمان السكر هينقص معلقتين
تبقى كدة عايش اهوة
ولو خبطت فحاجة دا دليل قوى انك موجود وتشغل حيز من الفراغ
عرفت تنزل وتخرج وتقابل ناس كئيبة اكتر منك
هتفاجىء بيهم شافووك وانت داخل عليهم
وقامو وسلمو عليك ... وقعدو يشتكولك من همهم
نفس الناس اللى انت كنت نازل تقع فعرضهم وتقوللهم الحقونى
هيتكلمو كتير اوى ... فأول لحظة صمت حد فيهم هيقوللك
وانت عامل ايه صحيح
هتقولله كويس....الحمد لله
مش هتبقى عايز تتكلم لمجرد أكلان الوقت مع انك كنت نازلهم ونفسك حد يسمعك
يبقى انت اكيد عايش يا معلم
تيجي تفتح النت تلاقى اصحابك بيكلموك وبيسألو عليك وانت ترد عليهم وهما يردو على ردك وهكذا
انت حاسس انك ميت ... بس الواقع بيقول انك عايش

ولو انت بقى ميت من زمااان بس فاكر نفسك عايش
هتعرفها ازاى دى
ايوة طبعا .. فاكر نفسك عايش واخر حلاوة .. وانت ميت من زمان يا عمو
هو انت حد خد رأيك اذا كنت حابب تيجى الدنيا دى ولا هتقسو عليك
يعنى مهما كان معلش الحياة تجربة
قد تكون لطيفة وقد تكون بنت وسخة
يعنى بجد طالما دى تجربة محتمل جدا انك تعانى منها
من اقل حقوقك ان حد يستعنيك وياخد رايك فالموضوع دا قبل ما تتولد
وانت تقرر تحب تعيش التجربة اللى هتخلليك بنى أدم ولا هتدفنك بالحياة
أكبر ظلم بيواجه البشرية بجد هو دا
تجيب ناس تعذبها معاك فالدنيا ليه
وكأنك بتنتقم من ابنك وبتقول له
زى ما انا جيت الدنيا وشفت منها قسوة وجبروت
لازم اجيب عيال وافرض عليهم يدوقوا ماللى دقته
ويعيشو نفس المعاناة
اشمعنى انا استحملت
لا لازم اجيب عيال اتطلع ميتين ابوهم زى ما انا طلع ميتين ابويا
تحكم بالوراثة
كل جيل يطلع ميتين الجيل اللى بعده
وهكذا ،،،،

دلوقتى بقى هقنعك بالعكس
هقنعك انك ميت ... مع انك مفكر نفسك عايش
الغريب يا أخى ان الميت بيشوف الناس وهما زعلانين عشانه
زعل من نوعيه مكنش يومك
والكلام الفاضى دا
وبيشوف صوانه وبيشوف حجات كتير تثبتله انه مات
لكن هو مبيشوفش غير اللى عينه عايزة تشوفه وبس
حد بيكلمك .... طب حد بيحبك ... طب حد بيسأل عليك ....
طب غير انك عايش لوحدك
لك اصحاب بيسألو عليك ... بيتكلموا معاك ... بيسمعوك ولا بتسمعهم بس ....
وانت يا اهبل لما تقعد شات وتكلم اصحابك وتلاقى كلامك مبيوصلش تفتكر النت الشبكة واقعة
وانت ايدك عالكيبورد بتهبد فيه بس الكيبورد كأنه مش شغال مبيكتبش
كل ما تروح تدور على شغل وكل مرة تروح الإنترفيو ومتشتغلش
ما يمكن روحك راحت المكان ومتعينتش لأنك ميت ومروحتش اصلا
ما كتير اوى وانت بتعدى الطريق تعدى من قدامك عربية بسرعة كان بينها وبينك اقل من سنتى
وتقول بكل غباء الحمد لله مخبطتنيش كنت هموت
ما يمكن خبطتك ومت وانت مش عارف
ثانية كدة
هو انت لما تبقى معندكش لا شغل ولا بيت ولا ناس ولا طاقة ولا أمل فإنك تحقق شيء انت عاوزة
تبقى عايش ،،
انت حتى علاقتك بربنا
بتصلى ومؤمن وبتحمد ربنا ومتملكش غير انك تدعى وتطلب منه
بس منتش عارف ربنا بيتقبل ولا زعلان منك
يعنى كمان بعد كل السوااااد اللى انت شايفه فدنيتك احتمال كبير جدا ربنا يفضل زعلان منك
مسألتش نفسك هتروح النار ولا الجنة لما تموت بجد ،،،
انا دايماً حسا ان والله اعلم انا هتحبس فى زنزانة
مش هتعذب ولا اروح النار ... بس هبقى سامعه كل حاجة بتحصل برة
ربنا هيكتفى بإنه يعذبنى عذاب نفسي والله اعلم

العايش دايماً شايف نفسه ميت .... والميت شايف نفسه عايش حتى لو شايف صوانه بيتنصب قدامه
اللى عايش نفسه يموت .... والميت نفسه يعيش
الحمد لله

Read More

القاعدة وبلاويها واللى بيجرا فيها

لكل الشباب الأمور اللى مش عاجبه الدراسة والمذاكرة
اسقط وعيد السنة as much as u can
اوعى تتخرج

تخيل ..... سنين على نفس النمط
فالبيت انا معترفة انهم بيسيبولى النت كتير
ميعرفوش ان انا اساسا ببقى قاعدة زهقانة
بس دى انجح طريقة لإضاعة الوقت اللى اصلا ضايع ضايع
اعمل ايه بقى
اداون لود افلام شفتها قبل كدة
او افلام شغاله عالتليفزيون اساسا
وافتحها تشتغل وانا مش مركزة معاها
سرحانة فى اللا شيء
وافضل اضيع فوقتى عالنت لحد ما ضهرى ينقطم واقوم اتخمد ويضيع اليوم وييجى اللى بعده

ولو حصلت الكارثة وحد طلب منى الجهاز
شوشو انتى هتقومى امتى
سؤال من 4 كلمات ولكنه يحمل معانى كتير
معناه ان قومى وقومى دى لها تمن
قومى دى يعنى واجهى الحياة الأليمة بكل سخافتها
الجهاز مشغول والتليفزيون 90 % مشغول بردو
ويصبح أملى كله الحصول على ريموت التليفزيون
دى الحياة اليومية واللى ببات وبصبح فيه من سنة 2007
مع العلم ان انا خدت من 2002 لـ 2005 نفس القصة ثانوى عام منازل
بس كان بيعوضها النزول والخروج والدروس والحياة اللطيفة كل يوم دى

المهم والفكرة اللى انا عاوزة اوصلهالك ان انا قضيت حياتى فبيتنا اكتر من برة زى ما انت شايف
وعلى النمط دا ... متعلمتش الخبرة والدردحة والليونة والذكاء الإجتماعى
فحضرتك لما هتقابلنى
بنى أدمة سخيفة جداً ... رزلة جداً ... دمى تقيل جداً جداً ... ودى صورة عامة عند ناس كتير وانا عارفة
وحقك طبعا تشوفنى كدة لأن دا اللى الواقع ..
ييجى دور مين بقى
المقربين منى اللى عارفين انى لطيفة ظريفة
يقومو يضايقو ويعترضوا ويكلمونى مرة واتنين وتلاتة وعشرين كأنى بكره الناس وقاصدة اعاملهم وحش
مع ان القصة مش كدة خالص ....

اخر حاجة بنقدر نعملها لما البيت كله يزهأ اننا نسافر
ودى نعمة من عند ربنا محدش يقدر ينكرها ومش بيوت كتير بتعملها
ابص الاقى نفسي بحالتى العجب العجاب دى
مش عايزة اسافر ولا اروح ولا اجى
وبفضل البقاء وحيدة شريدة فالبيت
وان حسيت ان دا هيعمل أزمة ومشاكل ووجع دماغ بروح معاهم
عشان ارضى الكل
اتفاجىء بنفسي قضيت اليوم حركة واتنقلت بجسمى من مكان لمكان لكن عقلى مش معايا
فينه .... معرفش .... سرحت فإية .... ولا حاجة .... منبسطتش ليه .... مش فاكرة
مجنونة تقريباً او نفسية وعصبية معرفش

نيجى بقى للشق الأخر من الحديث
ــــــــــــــــــــــــــــــــــــــــــــــــــــــ


الجزء اللى بيقول
مالك ... ما انتى الحمد لله ... عايشة احسن عيشة ... بتلبسي وبتطفحى
وبتتفسحى وباشا ومصروف كل شهر ودلع
مش تقولى الحمد لله ؛
المفروض ان قائل هذه العبارة بيوضحلى أد ايه انا واطية ومش شايفة الجانب الحلو فحياتى وان انا غلطانة
مع ان انا معترفة بدا كله وفضل ونعمة من عند ربنا وانا بقول الحمد لله
مبسوطة مدبوحة الحمد لله
تعبانة كويسة الحمد لله
بضحك بعيط الحمد لله
عايشة ميتة برضه بقول الحمد لله

بس انا بحس بجد مش تهريج انى عالة عالمجتمع وعاللى حواليا
حتى لو عندى اللى بيصرف عليا الحمد لله
انا عاوزة احس انى اقدر اعتمد على نفسي
مجرد الإحساس انك تقدر تعمل الشيء
كأنك بالظبط عملته
حتى لو معملتوش هتحس كأنك عملته

يارب انا راضية بالحياة اللى رزقتنى بيها واللى ادتهولى واللى مدتهوليش
انا بس خايفة فيوم اقع على بوزى والدنيا تفرمنى بسبب قلة حيلتى وضعفى واستسهال الحياة المرفهة دى
وانا مش عايزة ابقى كدة

Read More

ما اعتدناه من أقوال معسورة

الموقف تحت السيطرة

!!!

الأمن مستتب
!!!

احتوينا الأمر يا فندم
!!!

الحادث نتيجة ماس كهربى
( دا دايماً )

مريض عقلى قام بفعلته
( فى حوادث الإعتداء ومحاولة الإقتحام )


مصر مستهدفة من جهات خارجية
( أموت بقى وافهم مستهدفة منين إذا كان أعداء البشرية فالعالم كله اسمهم عندنا " دول شقيقة " )

مصر مضيافة
(بلد الكرم ويوم ما نزهق من حد بنطلع بيان انه غير مرحب بيه
لكن لا بنضربه ولا نهينه ولا نوقفله أمن مركزى خالص خالص)


بلد الأمن والأمان
( أمن قومى لحماية الوطن حد يقدر يقول غير كدة ؟ )
( أنا اقدر اقول انها بلد القمل والسبان عفواً )

قلة مندسة تحاول البلبلة والتحريض وإثارة الشغب
( اللى أكيد سيادتك واحد منهم يا معارض يا قليل الأدب يا جزمة )


هذا كلام عارى تماماً من الصحة
( وذلك عند وجود تقارير وصور ودلائل والإتصال بمسئول للتحقق من الواقعة )

إنتخابات حرة نزيهة
( طبعاً )

شـــــفـــــأفــــيـــة
( دا أساسى )

سوف يأخذ القانون مجراه
(وحللنى بقى )

ننتظر حكم القضاء العادل
( ولكننا فى واقع الأمر لا ننتظر سوى تطبيق حكم القضاء العادل
لأن حكومتنا الموقرة لا بتحترم احكام القضاء ولا بتطبقها ولا بتحترم القاضى المصرى اصلاً )


هل لديك أقوال أخرى ؟؟؟
...
..
.

Read More